डोंबिवलीत ८ जानेवारीला महानगर गॅस पुरवठा बंद राहणार
डोंबिवली शहरातील बहुतांश भागात महानगर गॅस कंपनीतर्फे वाहिकेद्वारे गॅस पुरवठा केला जातो. डोंबिवली एमआयडीसीसह पूर्व भागातील अनेक भागांमध्ये हा पुरवठा सुरळीत चालू आहे. मात्र, डोंबिवली पश्चिमेतील काही सोसायट्यांमध्ये वाहिका टाकण्यात आल्या असून गॅस पुरवठा अद्याप सुरू झालेला नाही.
महानगर गॅसच्या परिचालन व देखभाल विभागाचे सहाय्यक व्यवस्थापक आकाश जैन यांच्या स्वाक्षरीचे एक पूर्वसूचनापत्र सोसायटी पदाधिकारी, बंगलेमालक व व्यावसायिकांना वितरित करण्यात आले आहे. या पत्रानुसार, मुख्य गॅस पुरवठा वाहिकेची देखभाल व दुरुस्ती करण्यासाठी ८ जानेवारी २०२५ रोजी डोंबिवली शहराचा गॅस पुरवठा सकाळी ११ ते संध्याकाळी ६ वाजेपर्यंत बंद राहणार आहे.
डोंबिवलीतील नागरिकांनी ८ जानेवारी रोजी गॅस पुरवठा बंद राहण्याची नोंद घेऊन आवश्यक ती खबरदारी घ्यावी, असे आवाहन करण्यात आले आहे.
नागरिकांची गैरसोय: महानगर गॅस बंदमुळे निर्माण होणारी अडचण
८ जानेवारी रोजी महानगर गॅसचा पुरवठा बंद राहणार असल्याने डोंबिवलीतील नागरिकांमध्ये चिंतेचे वातावरण आहे. मागील सात-आठ वर्षांपासून महानगर गॅसद्वारे घरगुती गॅस पुरवठा सुरळीत चालू असल्याने अनेक नागरिकांनी गॅस सिलिंडर कंपन्यांच्या एजन्सीला आपले सिलिंडर परत केले आहेत.
महानगर गॅसच्या शेगडींना गॅस सिलिंडरचे नोझल व्यवस्थित बसत नसल्यामुळे तात्पुरत्या गॅस सिलिंडरचा वापर करून स्वयंपाक करणे अनेकांसाठी शक्य नाही, असे महानगर गॅस पुरवठाधारक ग्राहक राजू नलावडे यांनी सांगितले.
इतक्या वर्षांनी प्रथमच महानगर गॅसचा पुरवठा बंद राहणार असल्याने नागरिकांना अनेक पर्यायांचा शोध घ्यावा लागणार आहे. भाजीपोळी केंद्र, हॉटेल, घरपोच भोजन पुरविणाऱ्या एजन्सींवर एक दिवसासाठी अवलंबून राहावे लागणार आहे.
घरगुती गॅस पुरवठ्यावरच अवलंबून असल्याने बहुतेक नागरिकांनी विद्युत शेगडी, स्टोव्ह यांसारखी पर्यायी उपकरणे वापरात ठेवलेली नाहीत, हेही नलावडे यांनी नमूद केले. या परिस्थितीमुळे अनेक कुटुंबांना रोजच्या स्वयंपाकासाठी मोठ्या अडचणींचा सामना करावा लागणार आहे.
महानगर गॅस कंपनीने वेळेत गॅस पुरवठा सुरू करून नागरिकांची गैरसोय टाळावी, अशी मागणी आता जोर धरू लागली आहे.
